جاپان کے وزیراعظم شنزو ابے نے عہدے سے استعفیٰ دے دیا ہے ۔
بین الاقوامی میڈیا رپورٹس کے مطابق جاپانی وزیراعظم خراب صحت کے باعث مستعفی ہوئے،شنزوابے کئی سالوں تک بڑی آنت کی بیماری السریٹیو کولیٹیس کے شکار ہیں تاہم خیال کیا جا رہا ہے کہ حالیہ عرصے میں اُن کی طبعیت مزید خراب ہوئی ہے۔۔
65 سالہ شنزو ابے نے استعفیٰ دیتے ہوئے کہا کہ صحت کے مسائل کے سبب اہم ذمہ داری اٹھانے سے قاصر ہوں۔
حکمراں جماعت لبرل ڈیموکریٹک پارٹی (ایل ڈی پی) کے حکام نے اس بات کی تصدیق کر دی ہے۔
شنزوابے اس وقت تک اپنے عہدے پر رہیں گے جب تک کہ پارٹی ان کا نیا جانشین منتخب نہیں کر لیتی۔
شنزو ابے 7 سال 8 ماہ تک جاپان کے وزیر اعظم رہے اور انہیں جاپان کی تاریخ کا سب سے زیادہ مدت تک وزیراعظم رہنے کا اعزاز حاصل ہے۔
اس سے قبل 2006 سے 2007 تک شنزو ابے جاپان کے وزیراعظم رہ چکے ہیں جبکہ 2005-06 میں چیف کیبنٹ سیکرٹری بھی رہ چکے ہیں۔
وزیرِ اعظم آبے انتہائی قدامت پسند اور قوم پرست شہرت رکھتے ہیں، جبکہ معاشی ترقی اور اپنی جارحانہ معاشی پالیسی کے لیے بھی مشہور ہیں جسے اب ‘آبینامکس’ کہا جاتا ہے۔
